افغان طالبان نے 7 تاریخ کو عبوری حکومت کے قیام کے اعلان کے بعد ایک بیان جاری کرتے ہوئے کہا کہ عبوری حکومت افغانستان میں “پائیدار امن ، خوشحالی اور ترقی” کو یقینی بنائے گی۔

طالبان کے ترجمان ذبیح اللہ مجاہد نے کہا کہ طالبان کے اعلیٰ ترین رہنما ملا ہیبت اللہ اخونزادہ امیر کی حیثیت سے ملک کی قیادت کریں گے۔
بیان میں کہا گیا ہے کہ عبوری حکومت کے ارکان اسلام کے اصولوں کے تحت ملک کے اعلیٰ مفادات کے تحفظ ، سرحدوں کی حفاظت اور افغانستان میں “پائیدار امن ، خوشحالی اور ترقی” کو یقینی بنانے کے لیے سخت محنت کریں گے۔ افغانستان باہمی احترام کی بنیاد پر پڑوسی ممالک اور دنیا بھر کے ممالک کے ساتھ مستحکم اور صحت مند تعلقات استوار کرنے کے لیے تیار ہے اور کسی بھی شخص یا تنظیم کو کبھی بھی افغان سرزمین کو دوسرے ممالک کی سلامتی کے لیے خطرہ بنانے کی اجازت نہیں دے گا۔ افغان حکومت تمام سفارتی مشنوں ، انسان دوست تنظیموں اور غیر ملکی سرمایہ کاروں کی حفاظت کے لیے سخت کوشش کرے گی۔
بیان میں یہ بھی کہا گیا ہے کہ افغان حکومت کو جنگ زدہ ملک کی تعمیر نو کے لیے عوام کی حمایت کی ضرورت ہے۔ افغان عوام کو اسلام کے اصولوں کی پابندی کرنی چاہیے۔ انہوں نے مزید کہا کہ افغان  حکومت انسانی حقوق کا تحفظ کرے گی۔